Bonus: Nie ‘n reg nie, maar kersie op die koek vir toegewyde werk

Die woord bonus laat altyd ore regop staan.   Onthou, ’n bonus is ’n ekstra betaling bo en behalwe jou salaris.  Dit verskil van ’n dertiende tjek, wat outomaties gegee word, amper soos ’n ekstra maand se salaris.  ’n Bonus is ’n ekstra dankie sê vir die werknemer wat meer doen as wat van hom of haar verwag word.

’n Werkgewer is nie verplig om bonus te betaal nie, tensy dit in jou kontrak, ’n ooreenkoms of ’n beleid gestel word.  Sonder so ’n reël is dit die baas se besluit.  Die ware beloning van werk lê tog in trots en waardigheid, nie net in geld nie.

Jy kan nie outomaties aanspraak maak op ’n gedeelte van ’n bonus indien jy voor die maand waarin bonusse uitbetaal word, bedank nie, tensy jou kontrak of die beleid uitdruklik daarvoor voorsiening maak.

’n Werknemer kan begin verwag dat ’n bonus betaal gaan word, indien die werkgewer jaar na jaar ’n bonus betaal.  Hierdie verwagting kan mettertyd afgedwing word, tensy die werkgewer dit baie duidelik stel dat betaling van bonus nooit ’n reg is nie, maar altyd afhang van die werkgewer se besluit.

’n Bonus se doel is hoofsaaklik om te motiveer en erkenning te gee aan harde werk.  Dit is daarom noodsaaklik dat ‘n werkgewer ’n regverdige stelsel het om te bepaal wie bonus kry en wat die waarde daarvan gaan wees. 

Onthou, bonus word nie betaal net omdat jy by die werk is nie.  Die werknemer wat maar net sy deel doen, het geen reg op ’n bonus nie.  ’n Bonus is om dankie te sê vir daardie werknemer wat die ekstra myl gestap het, wat meer gedoen het as wat van hom of haar verwag word.  Bonusse is om dankie te sê vir ekstra werk, dus die kersie op die koek.