Deurwinterde rugbyman dr. Jan Marais hou weer die leisels

Die deurwinterde rugbyman, dr. Jan Marais, hou weer eens die leisels by die Griffons -rugbyunie. Hy is vir ‘n verdere twee jaar as president van die unie herkies. Hy het ook deur die die jare sy stempel by SARU afgedruk. Daarby glo hy die Griffons sal in 2026 weer vir die Premierliga kwalifiseer.

Dr. Jan sien ‘n blink toekoms vir die Novavit-Griffons en dit is vir hom ‘n riem onder die hart dat jong talentvolle o.21-spelers (o.19 tot o.21) van die streek, tot sover as Bethlehem, nou die geleentheid het om in Welkom te ontwikkel. “Die spelers se talente sal later vir die seniorspan ‘n groot aanwins wees.”

Die ontwikkeling van die sowat dertig spelers is moontlik gemaak deur Harmony Gold se geldelike inspuiting vir vier jaar.

Dr. Jan het hom in 1980 as algemene praktisyn in Welkom gevestig. Twee jaar later het hy een van drie spandokters van die rugbyunie geword. Hy en dr. Abel Hugo, wat later president van die unie geword het, en wyle dr. Anton Mostert het om die beurt by wedstryde diens gedoen. Hy was ook vir 10 jaar verteenwoordiger van die mediese groep op die uniekomitee van die Griffons.

Van 2005 tot 2009 was hy vir die eerste keer president van die Griffons-rugbyunie. Daarna het nog termyne gevolg.

“Ons is ‘n ontwikkelende rugbyunie. Ons het al heelwat talent opgelewer en het nog nooit in die pad gestaan van talentevolle spelers wat hul onder meer by die Sewes, of ander unies, aangesluit het nie.”

Hy sê indien die onderskeie Griffonsspanne goed vaar sal dit meer toeskouers na die stadion lok.

“Ons wil graag hê die pawiljoene moet volgepak wees.”

Dr. Jan was ook vir 38 jaar ‘n stadsraadlid. Hy en sy vrou, Mariette, is is die trotse ouers van vier kinders. Hy is ook ‘n vaardige algemene praktisyn-narkotiseur.
(Deur Molly Green)