Gouties leer nou die boere van more in ‘n eerste vir die Goudveld

Goudveld-Hoërskool maak vanjaar geskiedenis deur ‘n nuwe rigting in te slaan. Dié bekende skool bied nou ook landbouvakke aan, en leerlinge gaan aktief leer om te boer. Dit maak Gouties in effek die eerste skool in die Goudveld  om dit te doen. Die landbouvakke is landboutegnologie, landboubestuur en landbouwetenskap.

“Kundige onderwysers is reeds aangestel en daar is groot belangstellng onder die leerlinge,” sê Mark Louwies (43), hoof.

“Daar is reeds twee vol klasse wat landboutegnologie as vak gekies het, asook een landboubestuursklas.” Leerlinge van Graad 10 tot Graad 12 word betrek.

Grond van sowat 150 ha tussen Welkom en Theunissen is deur Harmony Gold beskikbaar gestel. Sojabone, mielies en sonneblomme sal aanvanklik aangeplant word.

“Daar is boere wat help met die projek en ons is besig om toerusting bymekaar te maak. Die kinders gaan ook skoue bywoon om kennis oor onder meer hase, duiwe, konyne, bokke en beeste op te doen. Ons sien dit as praktiese opleiding vir die kinders.”

Die leerlinge sal onder meer opleiding oor trekkers ontvang, met indiensopleiding in draadspan en besproeiing.

Die leerlinge sal na afloop van die kursusse sertifikate ontvang wat dit vir hulle makliker sal maak om na matriek werk te kry. Hulle sal selfs in oorsese lande soos Amerika werk op plase kan kry.

Mark sê kultuur is ook vir hom baie belangrik. “Gouties het ‘n Kunste-akademie en ons kyk onder meer daarna om amfi-teater te bou.”

Sport gaan beslis nie afgeskeep word nie. “Ons wil ‘n Sportentrum ontwikkel waar afrigters onder meer opgelei kan word.”

Dié nuwe dinamiese hoof is ‘n man wat glo aan dissipline. “Dissipline is baie belangrik in ‘n skoolsituasie. Dissipline skep ‘n veilige omgewing vir kinders. Dit is nie ‘n straf nie.”

Sy besluit om die gebruik van selfone by die skool te verbied, werp reeds vrugte af. “Die kinders gesels pouses met mekaar en hulle speel speletjies.”

Hy sê Gouties is geseënd met ‘n besonderse personeeelkorps.
(Deur Molly Green)