Miné de Klerk verdien Golden Globes Senior Sportster van die Jaar

Miné de Klerk (23), ‘n oud-hoofmeisie van Goudveld-Hoërskool wat as GoldFM se Golden Globes Senior Sportster van die Jaar bekroon is, is een van die beste gewigstoot-atlete wat Suid-Afrika nog opgelewer het.

Miné, ‘n internasionaal-bekende veldatleet, sê die toekenning was ‘n verrassing. “Ek het dit glad nie verwag nie. Ek waardeer almal se ondersteuning in Welkom en die Goudveld.”

Sy is huidig vyfde op die ranglys van die NCAA (National Collegrated Athletics Association). Die NCAA reguleer atletiek by meer as 1 100 onderwysinstansies in die VSA en Kanada.

Miné het ‘n silwer medalje tydens die “Big Ten Indoor Championships” wat in Indianapolis, Indiana gehou is, gewen. “Die mededinging was baie sterk en is een van die bestes in Amerika, sê sy.  Haar reuse gooi van 18.48 m was haar beste ooit. Dit is ook ‘n nuwe binnenshuise SA-rekord. Dit is 11 cm beter as haar vorige beste gooi van 18,37 m.

Goeie nuus is dat sy nou klaar is met haar graad aan ‘n Amerikaanse universiteit waar sy sportsielkunde studeer het. Sy is is huidig besig met laaste deel van haar NCAA- seisoen. “Ek vlieg op 19 Junie terug Suid-Afrika toe.”

Diè dogter van dr. Ben de Klerk en sy vrou, Yolandie, se liefde vir gewigstoot het by Welkom Volkskool begin. Sy was 12 jaar oud toe sy met diskus begin het. Miné het Suid-Afrika trots gemaak toe sy in 2021 en 2022 twee medaljes in gewigstoot en spiesgooi op die o.20-wêreldatletiekkampioenskap gewen het.

Sy het onlangs vir Uplift Media News gesê haar harde werk word beloon. “Ek oefen vier maal ‘n week en is drie keer ‘n week in die gimnasium.  “Ek wil verder in Suid-Afrika studeer. Ek hoop ook om aan die volgende Olimpiese Spele deel te neem.”

Deur Molly Green