Tweeling Duke en Hunter Jacobs (6) trotse “Naudies” na oorlewingstryd as babas

Die gesegde lui: Wanneer die lewe jou suurlemoene gee, maak limonade, en niemand bewys dit beter as Duke en Hunter Jacobs nie. Hierdie twee vegtertjies van Beancha en Daniel Jacobs is op 6 Januarie 2019 op 31 weke gebore nadat Beancha ernstige swangerskap-komplikasies, onder meer lewer- en bloeddrukprobleme (die sogenaamde HELLP-sindroom), ontwikkel het. 

Die tweeling het kritieke sorg nodig gehad. “Ons sal nooit vergeet hoe klein en broos hulle was nie,” vertel Beancha. “Elke dag in die neonatale intensiewe sorg-eenheid (NICU) was ’n gebed.”

Duke en Hunter het 66 dae in Mediclinic Welkom en Rosepark Bloemfontein deurgebring, en op 7 Februarie 2019, net 31 dae oud, moes hulle weens hartafwykings PDA-hartoperasies ondergaan. “Daardie dag was die moeilikste van ons lewens,” sê Daniel. “Maar ons het geweet ons seuntjies is vegters, hulle het nie tou opgegooi nie.”

Vandag is Duke en Hunter gesond, energiek en vol lewe, soos twee vuurpyle op ’n lanseer-platform. Hulle het op 2 jaar en 6 maande “skool” aangedurf en 2026 bring ’n groot mylpaal:  Graad 1 by Naudeville Laerskool.

Hierdie twee manne sit nie stil nie – van 5 km Parkruns elke Saterdag saam met familie, tot Griffons-rugby en selfs stoei by die Welkom Stoeiklub, vat hulle elke uitdaging soos ’n bul by die horings.

“Hulle is die lewende bewys dat hoop en vasberadenheid berge kan versit,” sê Daniel.

Beancha voeg by: “Ons glimlag elke keer as ons sien hoe hulle groei. Van NICU tot klaskamer – dit is ’n pad vol genade.”

Die Jacobs-gesin dank hul Hemelse Vader elke dag vir nog ’n dag saam hul besige tweeling. “Soos die gesegde lui: Waar daar ’n wil is, is daar ’n weg. Ons seuns bewys dit elke dag.”
(Deur Lien Fouché)