JESUS ONTMOET JOU WAAR JY IS

Die afgelope paar weke het ek dinge beleef en gesien wat my weer laat vra het: “Hoekom, Here?” Dit laat ’n mens vra: Wat gaan aan met ons mensdom?

In Markus 7:32 (NLV) lees ons: “Hulle bring toe ’n dowe man met ’n spraakgebrek na Hom toe en soebat Hom om sy hand op die man te sit om hom gesond te maak.” Hierdie man was doofstom, maar hy het mense gehad wat hom liefgehad het en na Jesus toe gebring het. Jesus wou hom help, maar hierdie genesing gebeur op ’n besondere manier. Jesus neem hom eenkant toe, weg van die skare. Dit wys vir ons dat Jesus bereid is om ons persoonlik te ontmoet, presies waar ons is.

Die man kon nie hoor nie, daarom steek Jesus sy vingers in die man se ore en raak sy tong aan. Jesus ontmoet hom op ’n manier wat hy kan verstaan. Jesus wys hiermee: Ek weet waar jy is, en Ek weet wat jy nodig het.

So ontmoet Jesus ook vandag vir my en jou. Hy vra nie dat jy eers moet verander, regmaak of kwalifiseer nie. Hy ken jou reeds. God se Woord sê Hy het jou geken nog voor jy gebore is. Hy weet presies waar jy vandag staan.

Psalm 139:1–3 (NLV) sê: “Here, U deursoek my en ken my. U weet of ek sit en of ek opstaan. Elke oomblik weet U waar ek is.” Jesus sê vandag: “Ek is bereid om jou te ontmoet waar jy is.” Die vraag is: Is jy bereid om Hom toe te laat?

Kom vandag na Hom toe, vra vir genesing, vra vir sy aanraking, en sê: “Here, hier is ek. Ontmoet my vandag waar ek is.”

(Deur Pastoor Brett England. Foto verskaf)