Louis Fourie op pad na New York vir sy sesde marathon.

Louis Fourie. (Foto: Verskaf)

Die bekende Welkomse langasem, Louis Fourie (36), wil slegs die tweede Goudveldse atleet word wat die “Big Six”-marathonne oor 42,2km wêreld-wyd voltooi het. Hy berei nou voor vir sy sesde marathon, die New York-marathon, wat op 2 November plaasvind. Sy beste tyd nóg vir een van die marathonne was 3uur 28min en 32sek. Louis sê Louis Massyn het hom oorreed om aan die “Big Six” wêreldwyd deel te neem. Louis Massyn was die eerste Goudvelder wat die “Big Six” voltooi het.

Die eerste “major”-marathon waaraan Louis (Fourie) deelgeneem het, was die London-marathon in 2022. Dieselfde jaar het hy die Chicago-marathon voltooi, in 2023 die Berlyn-marathon, in 2024 die Boston-marathon, en vroeër vanjaar die Tokio-marathon. Nou wag die New York-marathon op hom. Volgende op sy wenslysie is die Sydney-marathon wat in Australië beplan word. Louis, ‘n persoonlike finansiële adviseur verbonde aan Momentum Financial Planning in Welkom, het reeds tien Twee Oseane-wedlope en tien Comrades-marathonne voltooi. Hy spog met altesaam twintig medaljes - een vir elke wedloop.

Die eerste padwedloop waaraan dié oud-leerling van Goudveld-Hoërskool deelgeneem het, was die Welkom Mediclinic-padwedloop oor 10km in 2008. Die hardloopgogga het hom toe gebyt.

Louis sê hy draf gemiddeld tussen sestig en sewentig kilometer vyf of ses dae ‘n week. “Wanneer ek twee dae gerus het, kan ek nie wag om weer te oefen nie.”

Hy volg nie ‘n spesiale dieët nie. Hy geniet egter pasta en pizzas, maar voor ‘n groot wedloop eet hy ‘n stewige stuk beeshaas, of te wel “steak”.